Gen 46 | TUCT | STEP | Tauvene Yakop iyau gabua tooni naol isov, ve toman natŋa ve timŋa tiburig gha tizila pa Isip. Tilaagh tila le tivot nugh Ber-Seba, ra i igham watooŋrau pa Maaron to taama Isak ta sewe.

aGnp 12:2; 50:1

bMbaŋ 7:15

cGnp 38:7-10

dIgham 1:5; Mbaŋ 7:14

Genesis 46

Yakop izila pa Isip

1 Tauvene Yakop iyau gabua tooni naol isov, ve toman natŋa ve timŋa tiburig gha tizila pa Isip. Tilaagh tila le tivot nugh Ber-Seba, ra i igham watooŋrau pa Maaron to taama Isak ta sewe. 2 Mboŋ tana, itandagh ighe Maaron ilam tooni, ve ipoii ighe: “Yakop, Yakop!”

Yakop iyok pa aliiŋa ighe: “Taug ene.”

3 Ra Maaron isaav pani ighe: “Yau Yoova. Yau Maaron to tamam Isak. Uroi pa uzila taan Isip sov. Pa yau aat nalat tomani ghom pa laghooŋ tsio, ve nagham paaghu tsio timasa timin eval kat ta sewe. Ve murei, yau aat nagham gham amuul alam taan tane. Ve saawe to mateegh tsio, natum Yosep tauu pale ileep zigem ve igharaat ghom.” ^a

5 Tauvene Yakop tomania natŋa, timŋa, ve raulivaŋa tizaa karis tau kinik to Isip iyambaar zi pazi na, ve tipaburigin laghooŋ toozi muul. Tipul nugh Ber-Seba, ve tilaagh tomania ŋgai ve saveeŋ mariŋ toozi tau tigham zi izi Kanaan na, ve tizila pa Isip. ^b

Pitiiŋ to Yakop paaghu tooni

8 Yakop paaghu tooni tau yesŋa tizila pa Isip na ezazi tauvene:

9 Ruben, i Yakop naatu aidaaba. Ruben natŋa, ene: Anok, Palu, Ezron, ve Karmi.

10 Ve Simeon natŋa, ene: Yemuel, Yamim, Oat, Yakin, Zoar, ve Saul. Saul tiina, i Kanaan tinazi.

11 Levi natŋa, ene: Gerson, Koat, ve Merari.

12 Ve Yuda natŋa, ene: Er, Onan, Sela, Peres, ve Zera. Eemon Er yesuru Onan timaat izi Kanaan. ^c

Yuda naatu Peres, i ipoop natŋa zitamoot ru, ezazi Ezron gha Amul.

13 Isakar natŋa, ene: Tola, Pua, Yop, ve Simron.

14 Ve Zebulun natŋa, ene: Seret, Elon, ve Yalel.

15 Yakop yesuru azaawa Lea tilepleep izi taan sirivu to Mesopotamia, ve tipoop natuzŋa zitamoot tane tomania natuzliva Dina. Tauvene Lea natŋa ve timŋa, yes irau tamoot ee saŋavul ve tol (33).

16 Gat natŋa, ene: Zipion, Agi, Suni, Ezbon, Eri, Arodi, ve Areli.

17 Ve Aser natŋa, ene: Imna, Isva, Isvi, ve Beria. Ve livuzi eeza Sera. Aser naatu Beria natŋa, ene: Eber gha Malkiel.

18 Tamtamon saŋavul liim ve ee (16) tane, ene Lea besooŋa tooni livaa Silpa yesuru Yakop natuzŋa ve timbuzŋa. Silpa tane, Lea taama Laban igham pani imin besooŋa tooni.

19 Yakop yesuru azaawa Rael natuzŋa, ene: Yosep gha Benyamin. 20 Saawe tau Yosep ilepleep izi Isip, yesuru azaawa Asenat tipoop natuzŋa ru, ezazi Manase gha Epraim. Yosep azaawa Asenat, i Potipera natliva. Potipera, i ŋeer to watooŋrau to nugh On.

21 Benyamin natŋa, ene: Bela, Beker, Asbel, Gera, Naaman, Ehi, Ros, Mupim, Upim, ve Art.

22 Tamtamon saŋavul ve paaŋ (14) tane, ene Yakop yesuru azaawa Rael natuzŋa ve timbuzŋa.

23 Dan ipoop naatu eemon, eeza Usim.

24 Ve Naptali natŋa, ene: Yazil, Guni, Yezer, ve Silem.

25 Tamtamon liim ve ru tane, ene Rael besooŋa tooni livaa Bila yesuru Yakop natuzŋa ve timbuzŋa. Bila tane, Rael taama Laban igham pani imin besooŋa tooni.

26 Tauvene Yakop natŋa ve timŋa tau yesŋa tizila pa Isip na, yes irau tamoot tol liim ve ee (66). Ve raulivaŋa, ene tinin zi tomani zi mako. 27 Ve isaav ighe talup Yakop tauu, natŋa, ve timŋa, tomania Yosep ve natŋa ru tau yesuru azaawa Asenat tipoop zi izi Isip na, ene timin tamoot tol saŋavul (70). Yes tane ta tilup zi ve tileep izi Isip. ^d

Yakop tomania natŋa ve timŋa tila tivot Isip

28 Yakop tomania natŋa ve timŋa tila tigharau Isip, ra imbaaŋ naatu Yuda imuuŋ ila, ve isavia varuzi pa Yosep ighe taama ilam ivot taan sirivu to Gosen wa. 29 Tauvene Yosep isaav pa uraata tooni gha tigharaat karis pani, ra izaa ve ila pa Gosen ighe ighita taama. Ila ivot tooni, ra isaghavu ve itaŋ pani le malau. 30 Ra Yakop isaav pani ighe: “Aa natug, yau naghe pa yo umaat wa. Eemon mako. Aazne, naghit ghom uleep matam yaryaare. Ighe namaat, namaat lak!”

31 Ra Yosep isaav pa tooghŋa ve taazi, tomania tamtamon toozi siriv tau yesŋa tilam na ighe: “Yau aat namuul nala to kinik, ve napaes pani naghe: ‘Tamaŋ, tazig ve toghagŋa tipul taan Kanaan, ve tilam tivot wa. 32 Yes zeran to ŋginiiŋ ŋgai. Tauvene tiyauur ŋgai tomania saveeŋ mariŋ toozi, ve tilam.’ 33 Yau aat nala tooni ve nasaav pani tauvene. Ve alooŋ. Yes Isipa lolozi pa tilup zi tomania yes zeran to ŋginiiŋ ŋgai mako kat. Tauvene saawe tau kinik ipoi gham ala tooni, ve ighason gham pa uraat tsiam, yam asaav pani tauvene aghe: ‘O tiina tsiei, saawe tau yei kukuamai ve ilam aazne, yei tamtamon to ŋginiiŋ ŋgai imin timbumaiŋa.’ Ighe asaav pani tauvene, i pale iyok payam to aleep izi taan sirivu to Gosen tane.”